Ապրիլի 16-ին Կապան քաղաքում անցկացվեց «Սպորտլանդիա» մարզական միջոցառման մարզային փուլը, որին մասնակցում էին Սյունիքի մարզի հանրակրթական դպրոցների 1–3-րդ դասարանների թիմերը։ Մրցումը համախմբել էր մարզի տարբեր համայնքների դպրոցականներին՝ ստեղծելով առողջ մրցակցային և տոնական մթնոլորտ։

Մարզային փուլին մասնակցեցին Գորիսի Յուրի Բախշյանի անվան թիվ 3 հիմնական դպրոցը, Գորիսի թիվ 5 հիմնական դպրոցը, Կապանի թիվ 1 և թիվ 7 հիմնական դպրոցները, Քաջարանի թիվ 2 հիմնական դպրոցը, Մեղրիի թիվ 1 հիմնական դպրոցը, ինչպես նաև Սիսիանի թիվ 2 և թիվ 4 հիմնական դպրոցները։

Թեժ ու հետաքրքիր պայքարի արդյունքում Գորիսի Յուրի Բախշյանի անվան թիվ 3 հիմնական դպրոցի 1–3-րդ դասարանների սաները հանդես եկան վստահ ու կազմակերպված՝ մեծ առավելությամբ զբաղեցնելով առաջին մրցանակային տեղը։ Նրանց հաղթանակը պայմանավորված էր ոչ միայն ֆիզիկական պատրաստվածությամբ, այլև թիմային համախմբվածությամբ, կարգապահությամբ և հաղթելու վճռականությամբ։

Այս հաջողության շնորհիվ դպրոցը կներկայացնի Սյունիքի մարզը «Սպորտլանդիա» մարզական միջոցառման հանրապետական փուլում՝ արժանապատվորեն ներկայացնելով համայնքն ու մարզը։

Մրցումների նպատակն էր խթանել սովորողների ֆիզիկական ակտիվությունը, ձևավորել առողջ ապրելակերպի մշակույթ, զարգացնել թիմային աշխատանքի հմտությունները, ինչպես նաև ամրապնդել դպրոցների միջև համագործակցությունն ու բարեկամական մրցակցությունը։

Թիմի հաջողության մեջ կարևոր դեր ունեն մարզիչներ Աննա Աբգարյանը և Ռոբերտ Արզումանյանը, որոնց հետևողական աշխատանքի և նվիրվածության շնորհիվ սաները գրանցեցին բարձր արդյունք։