Սյունիքի մարզում կայացել է «Վարչապետի գավաթ» դպրոցականների թիմային խճուղավազքի մարզային փուլը, որը միավորել է տասնյակ դպրոցների աշակերտների՝ խթանելով առողջ ապրելակերպը և մարզական ակտիվությունը։

Մրցաշարի հիմնական նպատակն է ոչ միայն զարգացնել դպրոցականների ֆիզիկական պատրաստվածությունը, այլև նրանց մեջ սերմանել առողջ կենսակերպի արժեքներ, ամրապնդել կամքի ուժը և ձևավորել թիմային համագործակցության մշակույթ։

Մրցումներին մասնակցել են նաև Գորիսի Յուրի Բախշյանի անվան թիվ 3 դպրոցի աշակերտները։ Յոթ հոգուց բաղկացած թիմը՝ հինգ տղա և երկու աղջիկ, հանդես է եկել կազմակերպված և համախմբված՝ ցուցադրելով բարձր պատասխանատվություն և հաղթելու ձգտում։

Աշակերտները մրցուղին հաղթահարել են մեծ նվիրումով ու տոկունությամբ՝ յուրաքանչյուր փուլում ցուցաբերելով թիմային աջակցություն և կամքի ուժ։ Նրանց ելույթը առանձնացել է ոչ միայն ֆիզիկական պատրաստվածությամբ, այլև փոխօգնության և միասնական պայքարի կարևորության ընդգծմամբ։

Ընդհանուր 45 թիմերի մասնակցությամբ մրցապայքարում Գորիսի Յուրի Բախշյանի անվան թիվ 3 դպրոցի թիմը զբաղեցրել է պատվավոր 12-րդ հորիզոնականը՝ արժանապատվորեն ներկայացնելով ուսումնական հաստատությունը և դառնալով համախմբվածության ու նպատակասլացության վառ օրինակ։