2026 թվականի մայիսի 7-ին Վանաձոր քաղաքում անցկացվել է «Սպորտլանդիա 2026» մարզական միջոցառման հանրապետական փուլը, որին մասնակցել են Հայաստանի բոլոր մարզերի և Երևան քաղաքի լավագույն դպրոցական թիմերը։

Գորիսի Յուրի Բախշյանի անվան թիվ 3 հիմնական դպրոցը ներկայացնող 1–3-րդ դասարանների «Սլացք» թիմը պատվով ներկայացրել է Սյունիքի մարզը՝ ցուցադրելով բարձր պատրաստվածություն, համախմբվածություն և պայքարելու կամք։

Մրցումներն անցել են լարված և հետաքրքիր մթնոլորտում։ Դպրոցականները մրցել են արագության, ճարպկության, ֆիզիկական պատրաստվածության և թիմային աշխատանքի տարբեր փորձություններում՝ դրսևորելով մարզական ոգի ու հաղթանակի ձգտում։

«Սլացք» թիմը հանդես է եկել կազմակերպված և վստահ ելույթներով։ Թիմի յուրաքանչյուր անդամ իր ներդրումն է ունեցել ընդհանուր հաջողության մեջ՝ ցուցաբերելով պատասխանատվություն, փոխօգնություն և կամքի ուժ։

Արդյունքում թիմը վաստակել է 34 միավոր և ընդամենը մեկ միավորի տարբերությամբ զբաղեցրել պատվավոր 4-րդ հորիզոնականը՝ արժանանալով ներկաների բարձր գնահատանքին ու ծափողջույններին։

Միջոցառման ավարտին մասնակից երեխաներին հանձնվել են սպորտային համազգեստներ, իսկ դպրոցին՝ մարզական գույք։ Թիմը պարգևատրվել է նաև շնորհակալագրով՝ ակտիվ և օրինակելի մասնակցության համար։

Թիմի մարզիչներն են դպրոցի ֆիզկուլտուրայի ուսուցիչներ Աննա Աբգարյանը և Ռոբերտ Արզումանյանը, որոնց հետևողական ու նվիրված աշխատանքը կարևոր դեր է ունեցել թիմի հաջող ելույթի ապահովման գործում։