Հուզիչ ու հիշարժան մթնոլորտում Գորիսի Յուրի Բախշյանի անվան թիվ 3 հիմնական դպրոցի 4-րդ «Ա» դասարանի սովորողները հրաժեշտ տվեցին տարրական դպրոցին՝ ամփոփելով ուսումնական կյանքի առաջին կարևոր փուլը։ Կազմակերպված միջոցառումը լի էր ջերմությամբ, անկեղծ հույզերով ու գեղեցիկ հիշողություններով։ Սովորողները շնորհակալության ու սիրո խոսքեր հղեցին իրենց դպրոցին, ուսուցիչներին և ծնողներին՝ ընդգծելով, որ հենց այստեղ են կատարել առաջին քայլերը դեպի գիտելիքի աշխարհ, սովորել կարդալ ու գրել, ձեռք բերել ընկերներ և ձևավորել մանկության ամենաթանկ հուշերը։ Միջոցառման ընթացքում երեխաները հատուկ երախտագիտությամբ անդրադարձան իրենց դասվար Նունե Գալստյանին, ով չորս տարիների ընթացքում նրանց համար եղել է ոչ միայն ուսուցիչ, այլև հոգատար ու վստահելի ուղեկից։ Նրանք ընդգծեցին, որ դասվարի համբերատարությունն ու նվիրված աշխատանքը կարևոր դեր են ունեցել իրենց ուսումնառության և անձնական ձևավորման ճանապարհին։ Իր խոսքում Նունե Գալստյանը շնորհակալություն հայտնեց սովորողներին՝ ակտիվության, աշխատասիրության և միջոցառման ընթացքում ցուցաբերած ջերմ վերաբերմունքի համար։ Նա նաև գնահատանքի խոսքեր ուղղեց ծնողներին և դպրոցի ղեկավարությանը՝ շարունակական համագործակցության ու աջակցության համար։ Հուզիչ պահերով ուղեկցվող միջոցառման ավարտին ծնողները ևս իրենց շնորհակալությունն ու գնահատանքը հայտնեցին դասվարին՝ երեխաների կրթության և դաստիարակության գործում ցուցաբերած նվիրումի, սիրո և հոգատար վերաբերմունքի համար։ Տարրական դպրոցին հրաժեշտ տվող փոքրիկները վստահությամբ ու մեծ սպասումներով պատրաստվում են կրթական նոր փուլին՝ իրենց հետ տանելով դպրոցական առաջին տարիների լուսավոր հիշողությունները։
| |
|
| |
| Դիտումներ: 221 | |
| Մեկնաբանություններն ընդամենը՝: 0 | |