Երևանի և ՀՀ մարզերի 47 մենթոր դպրոցներում անցկացվել է այս տարվա ուսուցչական համաժողովի մարզային փուլը՝ «Տեխնոլոգիական նորարարությունների դերը կրթության մեջ» խորագրով։

Համաժողովի նպատակն է ստեղծել համագործակցային հարթակ ուսուցիչների, կրթության կազմակերպիչների, ոլորտի մասնագետների և նորարարությամբ զբաղվող փորձագետների համար՝ կրթության մեջ տեխնոլոգիական նորարարությունների կիրառման լավագույն փորձի փոխանակման նպատակով։

Ուսուցչական համաժողովում քննարկվել են կրթական գործընթացում թվային գործիքների, արհեստական բանականության, առցանց հարթակների և այլ նորարարական տեխնոլոգիաների արդյունավետ կիրառման հնարավորությունները՝ ուսուցման որակի բարձրացման և սովորողների ներգրավվածության խթանման նպատակով։ Ներկայացվել են դպրոցներում կիրառվող նորարարական կրթական մեթոդներ և տեխնոլոգիական լուծումներ՝ նպաստելով ուսուցման գործընթացի արդիականացմանը և ստեղծագործական մոտեցումների տարածմանը։

Համաժողովի շրջանակում քննարկվող թեմաների հիմնական ուղղություններն են․

• «Ավագ դպրոցներում արհեստական բանականության ուսուցման ծրագրեր»
• «Դպրոցահասակ երեխաների արտադպրոցական տեխնոլոգիական կրթություն»
• «ԱԲ կիրառումը դասավանդելու և սովորելու գործընթացում»
• «Տեխնոլոգիաների կիրառման ռիսկեր, էթիկական խնդիրներ»
• «Կիբերանվտանգություն և թվային գրագիտություն»

Գորիսի Յուրի Բախշյանի անվան թիվ 3 հիմնական դպրոցի «Աշխարհագրություն» առարկայի ուսուցչուհի Հերմինե Ալավերդյանը ներկայացրել է «ԱԲ գործիքների կիրառումը աշխարհագրության դասաժամերին» զեկույցը: «Հայաստանի պատմություն» առարկայի ուսուցչուհի Ռուզաննա Խաչատրյանը ներկայացրել է «ԱԲ-ն՝ ուսուցչի ստեղծագործական գործընկեր» զեկույցը:

Ուսուցչական համաժողովի մարզային փուլին ներկայացվել և քննարկվել են 1000 և ավելի զեկույցներ՝ ուսուցիչների և կրթության ոլորտի պատասխանատուների կողմից։

Նշենք, որ աշխատաժողովի մարզային փուլին կհաջորդի հանրապետական փուլը, որը նախատեսվում է անցկացնել մայիս ամսին: