Գորիսի համայնքային մանկապատանեկան մարզադպրոցն անցկացրեց «ՀՀ Վարչապետի գավաթ» սիրողական խճուղային հեծանվավազքի դպրոցականների առաջնության համայնքային փուլը։ Մրցաշարին մասնակցեցին Գորիսի տարածաշրջանի հանրակրթական դպրոցների 7-9-րդ և 10-12-րդ դասարանների աշակերտները։

Միջոցառման նպատակն էր խթանել առողջ ապրելակերպը, նպաստել հեծանվային սպորտի մասսայականացմանը և ընդլայնել դպրոցականների ներգրավվածությունը մարզական կյանքում։

Առաջնությանը մասնակցեցին տարածաշրջանի 9 հանրակրթական դպրոցների ներկայացուցիչներ։ Մրցապայքարը անցավ բարձր մրցակցային և լարված պայքարի պայմաններում․ մասնակիցները ցուցադրեցին լավ ֆիզիկական պատրաստվածություն, դիմացկունություն և հաղթանակի ձգտում։

Մրցաշարում Գորիսի Յուրի Բախշյանի անվան թիվ 3 հիմնական դպրոցի աշակերտներ Արման Եղյանը և Միլենա Մելքումյանը պատվով ներկայացրին իրենց դպրոցը՝ զբաղեցնելով 4-րդ հորիզոնականը։

Նրանց արդյունքը ևս մեկ անգամ ընդգծում է դպրոցում սպորտի և առողջ ապրելակերպի խրախուսման ուղղությամբ իրականացվող հետևողական աշխատանքը։