Գորիսի Յուրի Բախշյանի անվան թիվ 3 հիմնական դպրոցի և Գորիսի բազմագործառութային պետական քոլեջի համագործակցության շրջանակում քոլեջի դասախոսական և վարչական աշխատակազմի համար իրականացվել է «Տեղեկատվական հաղորդակցման տեխնոլոգիաներ» թեմայով կարճաժամկետ վերապատրաստման դասընթաց։ Նախաձեռնությունն իրականացվել է քոլեջի Ինֆորմատիկայի, մաթեմատիկայի և տնտեսագիտության ամբիոնի կողմից՝ մասնակիցների թվային կարողությունների զարգացման և մասնագիտական հմտությունների կատարելագործման նպատակով։

Դասընթացի հիմնական նպատակն էր նպաստել կրթական ոլորտում ժամանակակից տեղեկատվական և հաղորդակցման տեխնոլոգիաների առավել արդյունավետ կիրառմանը, բարձրացնել աշխատակիցների թվային գրագիտության մակարդակը և նրանց զինել գործնական գիտելիքներով ու հմտություններով, որոնք անհրաժեշտ են արագ փոփոխվող և թվայնացվող աշխարհում արդյունավետ գործունեություն ծավալելու համար։

Վերապատրաստման ընթացքում մասնակիցները ծանոթացել են թվային գործիքների և առցանց հարթակների կիրառման ժամանակակից մեթոդներին, քննարկել տեղեկատվական տեխնոլոգիաների դերը կրթական գործընթացի կազմակերպման և կառավարման գործում, ինչպես նաև ձեռք բերել նոր հմտություններ, որոնք կարող են կիրառվել առօրյա մասնագիտական գործունեության ընթացքում։

Դասընթացը վարել են Գորիսի Յուրի Բախշյանի անվան թիվ 3 հիմնական դպրոցի տնօրեն, Գորիսի բազմագործառութային պետական քոլեջի Ինֆորմատիկայի, մաթեմատիկայի և տնտեսագիտության ամբիոնի դասախոս Սերգեյ Ավանեսյանը, դպրոցի «Թվային գրագիտություն և համակարգչային գիտություն» առարկայի ուսուցչուհի, նույն ամբիոնի դասախոս Օլյա Ղուլյանը և ամբիոնի դասախոս Զարինե Աբգարյանը։ Նրանց մասնագիտական փորձը և գործնական գիտելիքները կարևոր ներդրում են ունեցել դասընթացի արդյունավետ կազմակերպման և հաջող իրականացման գործում։

Նման համագործակցային ծրագրերը նպաստում են կրթական հաստատությունների միջև փորձի փոխանակմանը, մասնագիտական կապերի ամրապնդմանը և կրթության որակի շարունակական բարելավմանը։ Գորիսի Յուրի Բախշյանի անվան թիվ 3 հիմնական դպրոցը կարևորում է կրթական գործընկերությունը և շարունակելու է աջակցել մասնագիտական զարգացմանն ու կրթական գործընթացի արդիականացմանն ուղղված նախաձեռնություններին։