Գորիսի Յուրի Բախշյանի անվան թիվ 3 հիմնական դպրոցում մեկնարկել է «Դասավանդի՛ր հանուն Հայաստանի» կրթական հիմնադրամի և ՅՈՒՆԻՍԵՖ-ի հայաստանյան գրասենյակի կողմից, ՀՀ կրթության, գիտության, մշակույթի և սպորտի նախարարության հետ համագործակցությամբ ու Ճապոնիայի դեսպանատան աջակցությամբ իրականացվող «Ողջույն դպրոց» ծրագիրը։ Ծրագիրն ուղղված է դպրոց ընդունվող ապագա առաջին դասարանցիների նախապատրաստմանը՝ նպաստելով նրանց սահուն անցմանը նախադպրոցական միջավայրից դպրոցական կյանք։ Նախաձեռնության շրջանակում երեխաների հետ իրականացվում են բազմաբնույթ զարգացնող աշխատանքներ, որոնք միտված են հաղորդակցական, ճանաչողական և ուսումնական հմտությունների ձևավորմանն ու ամրապնդմանը։ Ծրագրի ընթացքում երեխաները ծանոթանում են դպրոցական առօրյային, սովորում համագործակցել հասակակիցների հետ, ձեռք են բերում ինքնուրույնության տարրական հմտություններ և աստիճանաբար հարմարվում դպրոցական միջավայրին։ Այս ամենը նպաստում է, որ նրանք ավելի վստահ ու պատրաստ դիմավորեն առաջին դասարանի կարևոր և հետաքրքիր ճանապարհորդությունը։ «Ողջույն դպրոց» ծրագրի շրջանակում երեխաների հետ աշխատում է դպրոցի դասվար Ռիտա Շալունցը, ով կազմակերպում է տարիքային առանձնահատկություններին համապատասխան կրթական և զարգացնող գործունեություն։ Առաջիկայում, նոր խմբի ձևավորման դեպքում, կմեկնարկի նաև «Ամառային դպրոց» ծրագիրը։ Այն ևս նպատակ ունի օգնել երեխաներին նախապատրաստվել դպրոցական կյանքին, զարգացնել անհրաժեշտ հմտությունները և ավելի հեշտ ինտեգրվել կրթական միջավայրին։ Նման ծրագրերը կարևոր դեր են խաղում երեխաների կրթական ուղու հաջող մեկնարկի ապահովման գործում՝ ստեղծելով բարենպաստ պայմաններ նրանց ուսումնառության առաջին քայլերի համար։
| |
|
| |
| Դիտումներ: 91 | |
| Մեկնաբանություններն ընդամենը՝: 0 | |