Գորիսի Յուրի Բախշյանի անվան թիվ 3 հիմնական դպրոցի ռուսաց լեզվի ուսուցչուհի Շահանե Գյուրջյանը մասնակցել է «Մեր ապագան» կրթամշակութային բարեգործական հիմնադրամի կողմից կազմակերպված «Учу великому» մասնագիտական վերապատրաստման ծրագրին և արժանացել է Ռուսաստանի Դաշնության դեսպանի շնորհակալագրին։

Վերապատրաստման ծրագիրը նախատեսված էր ռուսաց լեզվի ուսուցիչների մասնագիտական կարողությունների զարգացման համար և նպատակ ուներ ներկայացնել դասավանդման ժամանակակից մեթոդներ, նորարարական կրթական տեխնոլոգիաներ, ինչպես նաև խթանել արդյունավետ մանկավարժական փորձի տարածումն ու փորձի փոխանակումը։

Ծրագրի ընթացքում Շահանե Գյուրջյանը կատարելագործել է իր մասնագիտական հմտությունները, ծանոթացել ռուսաց լեզվի դասավանդման նոր մոտեցումներին, հաղորդակցական ուսուցման մեթոդներին և թվային կրթական գործիքների կիրառման հնարավորություններին։ Գործնական աշխատանքներն ու մասնագիտական քննարկումները նպաստել են նրա մանկավարժական փորձի հարստացմանը, իսկ ձեռք բերված գիտելիքներն արդեն կիրառվում են ուսումնական գործընթացում՝ ապահովելով առավել արդյունավետ դասավանդում և սովորողների ակտիվ ներգրավվածություն։

Ուսուցչուհին մշտապես կարևորում է մասնագիտական շարունակական զարգացումը՝ իր աշխատանքում համադրելով ավանդական մանկավարժական արժեքներն ու ժամանակակից կրթական մոտեցումները, ինչը նպաստում է ստեղծագործական և զարգացնող ուսումնական միջավայրի ձևավորմանը։

Ռուսաց լեզվի պահպանման, զարգացման և հանրահռչակման ուղղությամբ իրականացվող հետևողական աշխատանքի, ինչպես նաև «Учу великому» վերապատրաստման ծրագրին ակտիվ մասնակցության համար Շահանե Գյուրջյանը պարգևատրվել է Ռուսաստանի Դաշնության դեսպանի շնորհակալագրով՝ «За большой вклад в сохранение и популяризацию русского языка в Армении» («Հայաստանում ռուսաց լեզվի պահպանման և հանրահռչակման գործում ունեցած մեծ ավանդի համար») ձևակերպմամբ։

Շնորհակալագիրը բարձր գնահատական է ուսուցչուհու մասնագիտական նվիրվածության, շարունակական ինքնազարգացման և կրթության ոլորտում ներդրած աշխատանքի նկատմամբ՝ ընդգծելով նրա կարևոր ներդրումը ռուսաց լեզվի ուսուցման և հանրահռչակման գործում Հայաստանում։