Օգոստոսի 19-ից Գորիսի Յուրի Բախշյանի անվան թիվ 3 հիմնական դպրոցում մեկնարկել էին 2026–2027 ուսումնական տարվան ընդառաջ կազմակերպվող մեթոդական միավորումների առաջին նիստերը։

Նիստերի ընթացքում մանկավարժական անձնակազմը քննարկել է նոր ուսումնական տարվա աշխատանքների արդյունավետ կազմակերպմանն առնչվող մի շարք կարևոր հարցեր։ Օրակարգում ընդգրկված են եղել դպրոցի աշխատանքային ռեժիմին, ուսումնական պլաններին, դասաբաշխմանը, ներքին կարգապահական կանոններին, թեմատիկ պլանավորմանը, նախագծային աշխատանքներին և մի շարք այլ հարցերի վերաբերող կետեր:։

Նիստերի ընթացքում դպրոցի տնօրեն Սերգեյ Ավանեսյանը ներկայացրել է դպրոցի նոր տնօրենի տեղակալ Մերի Մկրտչյանին՝ մաղթելով նրան արդյունավետ և արգասաբեր աշխատանքային գործունեություն։

Քննարկվել է նաև մեթոդական միավորումների ղեկավարների կազմը։ Բնագիտական, տեխնոլոգիական, ճարտարագիտական և մաթեմատիկական մեթոդական միավորման նախագահ Անուշ Դաջունցը հայտնել է պաշտոնում իր աշխատանքը չշարունակելու ցանկության մասին։ Մեթոդական միավորման նախագահի պաշտոնում առաջադրվել է Հերմինե Ալավերդյանի թեկնածությունը։

2026–2027 ուսումնական տարվանից Գորիսի Յուրի Բախշյանի անվան թիվ 3 հիմնական դպրոցում կգործեն վեց մեթոդական միավորումներ.

• Տարրական կրթության մեթոդմիավորում (ՏԿՄ) — նախագահ՝ Ռիտա Շալունց
• Օտար լեզուների մեթոդմիավորում (ՕԼՄ) — նախագահ՝ Մարգարիտա Պետրոսյան
• Հայոց լեզվի և գրականության, հայրենագիտության, հասարակության և հասարակական գիտությունների մեթոդմիավորում (ՀԼԳՀՀՀԳՄ) — նախագահ՝ Մերի Դանիելյան
• Բնագիտական, տեխնոլոգիական, ճարտարագիտական, մաթեմատիկական մեթոդմիավորում (ԲՏՃՄՄ) — նախագահ՝ Հերմինե Ալավերդյան
• Ֆիզիկական կրթության և առողջ, անվտանգ կենսագործունեության մեթոդմիավորում (ՖԿԱԱԿՄ) — նախագահ՝ Աննա Աբգարյան
• Արվեստի և արհեստի մեթոդմիավորում (ԱԱՄ) — նախագահ՝ Թամարա Հովհաննիսյան։

Մեթոդական միավորումների նիստերի անցկացումը նոր ուսումնական տարվան նախապատրաստական աշխատանքների կարևոր բաղադրիչներից է։ Դրանց ընթացքում համակարգվում են ուսուցիչների առաջիկա աշխատանքները, հստակեցվում են ուսումնական գործընթացի կազմակերպման առաջնահերթությունները և քննարկվում կրթական գործընթացի արդյունավետության բարձրացմանը միտված քայլերը։

Գորիսի Յուրի Բախշյանի անվան թիվ 3 հիմնական դպրոցում նախապատրաստական աշխատանքները շարունակվում են՝ նոր ուսումնական տարին կազմակերպված, համակարգված և նոր նպատակներով դիմավորելու համար։