Սեպտեմբերի 15-ին Գորիսի Յուրի Բախշյանի անվան թիվ 3 հիմնական դպրոցի աշխատակիցները հանդիպել են ՀՀ առողջապահական և աշխատանքի տեսչական մարմնի ներկայացուցիչների հետ։ Իրազեկման հանդիպման ընթացքում քննարկվել են կրթական հաստատությունների գործունեությանը վերաբերող մի շարք կարևոր հարցեր։ Մասնավորապես, անդրադարձ է կատարվել դպրոցի շենքային պայմանների, լաբորատորիաների և առարկայական կաբինետների նկատմամբ օրենսդրությամբ սահմանված պահանջներին, դրանց պահպանման և պատշաճ պայմանների ապահովման կարևորությանը։ Քննարկվել են նաև աշխատանքային օրենսդրության մի շարք կարգավորումներ և դրանց գործնական կիրառման առանձնահատկությունները։ Անդրադարձ է կատարվել աշխատողների աշխատանքային իրավունքներին և պարտականություններին, ինչպես նաև ծնողական ժամին վերաբերող կարգավորումներին։ Հանդիպումը հնարավորություն է տվել դպրոցի աշխատակիցներին մասնագետներից ստանալ պարզաբանումներ իրենց հետաքրքրող հարցերի վերաբերյալ և առավել մանրամասն ծանոթանալ գործող պահանջներին ու կարգավորումներին։ Դպրոցի տնօրեն Սերգեյ Ավանեսյանը շնորհակալություն է հայտնել ՀՀ առողջապահական և աշխատանքի տեսչական մարմնի ներկայացուցիչներին՝ իրազեկման հանդիպման, ներկայացված պարզաբանումների և մասնագիտական աջակցության համար։ Նա կարևորել է նման ձևաչափով հանդիպումների շարունակականությունը՝ ընդգծելով, որ դրանք նպաստում են օրենսդրական պահանջների վերաբերյալ աշխատակիցների իրազեկվածության բարձրացմանը և դրանց պատշաճ կիրառմանը դպրոցում։
| |
|
| |
| Դիտումներ: 14 | |
| Մեկնաբանություններն ընդամենը՝: 0 | |