Դպրոց-համայնք համագործակցությունը՝ կրթության և քաղաքացիական գիտակցության զարգացման կարևոր ուղի։ Գորիսի Յուրի Բախշյանի անվան թիվ 3 հիմնական դպրոցի 2026–2027 ուսումնական տարվա ուսումնադաստիարակչական աշխատանքների տարեկան պլանով (ՈՒԴԱՏՊ) նախատեսված՝ համայնքային կառույցների հետ համագործակցության շրջանակում 6-րդ «Ա» դասարանի սովորողները՝ դասղեկ Աննա Աբգարյանի ուղեկցությամբ, այցելեցին Գորիսի համայնքապետարան։ Այցի ընթացքում սովորողները հանդիպումներ ունեցան համայնքապետի տեղակալ Կարեն Քոչարյանի, համայնքապետարանի տարբեր բաժինների ղեկավարների և աշխատակիցների հետ։ Նրանք ծանոթացան համայնքապետարանի գործունեությանը, տարբեր ստորաբաժանումների աշխատանքին և համայնքի կառավարման գործընթացներին։ Հանդիպումն անցավ հետաքրքիր ու ճանաչողական մթնոլորտում։ Սովորողները մեծ հետաքրքրությամբ հետևում էին ներկայացվող տեղեկատվությանը, հարցեր ուղղում համայնքապետարանի ներկայացուցիչներին և փորձում ավելի լավ հասկանալ, թե ինչպես են ընդունվում համայնքային որոշումները և կազմակերպվում քաղաքի առօրյան։ Երեխաներից շատերի համար սա առաջին այցն էր համայնքապետարան։ Նրանցից ոմանք անկեղծորեն խոստովանեցին, որ երազել են լինել այստեղ։ Իսկ այցի ավարտին, երբ սովորողներին հարցրին, թե ինչ տվեց իրենց այս հանդիպումը, շատերը պատասխանեցին, որ նոր գիտելիքներ են ձեռք բերել և այժմ ավելի լավ են պատկերացնում համայնքապետարանի աշխատանքը։ Ավելին՝ ոմանք նշեցին, որ ապագայում կցանկանային աշխատել համայնքապետարանում։ Այցը ոչ միայն ճանաչողական փորձառություն էր, այլև հնարավորություն՝ սովորողների մեջ զարգացնելու քաղաքացիական գիտակցությունը, հանրային կառավարման նկատմամբ հետաքրքրությունը և սեփական համայնքի կյանքին մասնակցելու պատրաստակամությունը։ Դպրոցական կրթությունը դասագրքերով չի սահմանափակվում․ իրական միջավայրում ձեռք բերված փորձն օգնում է գիտելիքները դարձնել ավելի հասկանալի, իսկ ապագայի մասնագիտական երազանքները՝ ավելի առարկայական։ Գորիսի Յուրի Բախշյանի անվան թիվ 3 հիմնական դպրոցի տնօրինությունը շնորհակալություն է հայտնում Գորիսի համայնքապետարանի աշխատակազմին՝ ջերմ ընդունելության, արդյունավետ համագործակցության և սովորողների մասնագիտական կողմնորոշմանն ու քաղաքացիական կրթությանը նպաստելու համար։
| |
|
| |
| Դիտումներ: 19 | |
| Մեկնաբանություններն ընդամենը՝: 0 | |