«Ընթերցանության տարի» նախագծի շրջանակում Յուրի Բախշյանի անվան թիվ 3 հիմնական դպրոցի 4-ր «Գ» դասարանի սովորողները՝ դասվար Ռիտա Շալունցի ուղեկցությամբ, այցելեցին քաղաքային մանկական գրադարան։ Այցը նվիրված էր Թարգմանչաց տոնին և ևս մեկ առիթ էր արժևորելու հայերեն թարգմանության դերը համաշխարհային գրականության լավագույն ստեղծագործությունները հայ ընթերցողին հասանելի դարձնելու գործում։ Հանդիպման ընթացքում սովորողները ներկայացրին Լեոնարդո դա Վինչիի «Որդիական երախտագիտություն» ստեղծագործության հայերեն թարգմանությունը՝ փորձելով ոչ միայն ընթերցել, այլև խորությամբ ընկալել ստեղծագործության գաղափարական բովանդակությունը։ Ընթերցանությանը հաջորդեց բովանդակալից քննարկում։ Սովորողները վերլուծեցին ստեղծագործության իրադարձությունների հաջորդականությունը, բացահայտեցին առակի խրատական իմաստը, մեկնաբանեցին հերոսների վարքագիծը և արտահայտեցին սեփական դիրքորոշումը։ Առանձնահատուկ ուշադրություն դարձվեց ծնողների հանդեպ որդիական սիրո, երախտագիտության, հարգանքի և պատասխանատվության գաղափարներին։ Երեխաները փորձեցին ստեղծագործության ուղերձը կապել իրական կյանքի հետ՝ ներկայացնելով իրենց վերաբերմունքն ու անձնական դիտարկումները ծնողների նկատմամբ։ Այսպիսի քննարկումները նպաստում են ոչ միայն ընթերցածը գիտակցված ընկալելու և վերլուծելու կարողությունների զարգացմանը, այլև սովորողների բարոյական արժեքների ամրապնդմանը, սեփական մտքերը հիմնավորելու և ազատ արտահայտելու հմտությունների ձևավորմանը։ Այցը շարունակվեց ճանաչողական և զարգացնող խաղերով։ Գրադարանի աշխատակիցները կազմակերպել էին առաջադրանքներ՝ ուղղված սովորողների ուշադրության կենտրոնացման, արագ կողմնորոշվելու և մտածողության ճկունության զարգացմանը։ Լոտո խաղի միջոցով ստուգվեց և ամրապնդվեց մայրենի լեզվի իմացությունը՝ ուսուցման գործընթացը դարձնելով միաժամանակ հետաքրքիր, աշխույժ և մրցակցային։ Գրադարանավար Գայանե Աթայանը և գրադարանի աշխատակիցները սովորողներին, նրանց ծնողներին ու դասվարին ընդունեցին մեծ ջերմությամբ և հոգատարությամբ։ Նրանց պատրաստակամությունն ու կազմակերպված աշխատանքը նպաստեցին, որ հանդիպումը վերածվի հաճելի, ուսուցողական և հիշարժան կրթական փորձառության։ Օրը ևս մեկ անգամ ցույց տվեց, որ ընթերցանությունը պարզապես տեքստի ընթերցում չէ․ այն մտածելու, հարցադրումներ անելու, սեփական աշխարհայացքը ձևավորելու և մարդկային արժեքները ճանաչելու ճանապարհ է։ Գիրքը միավորում է սերունդներին, իսկ ընթերցանությունը ձևավորում է մտածող, զգացող և արժեհամակարգ ունեցող անհատներ։ Շնորհակալություն քաղաքային մանկական գրադարանի աշխատակազմին՝ ջերմ ընդունելության, հետաքրքիր նախաձեռնությունների և արդյունավետ համագործակցության համար։ | |
|
| |
| Դիտումներ: 8 | |
| Մեկնաբանություններն ընդամենը՝: 0 | |