Ապրիլի 28-ին Գորիսի Յու. Բախշյանի անվան թիվ 3 հիմնական դպրոցի 8-րդ «Բ» դասարանում տեղի է ունեցել Հայոց ցեղասպանության 107-րդ տարելիցին նվիրված միջոցառում: 

«Հայը եղել է, կա ու կլինի» խորագիրը կրող միջոցառումը կազմակերպել էր 8-րդ «Բ» դասարանի դասղեկ Մերի Մկրտչյանը:

Միջոցառման մասնակիցները նախ մեկ րոպե լռությամբ հարգեցին 1915 թվականի ահեղ ոճրագործությանը զոհ գնացած հայերի հիշատակը: Այնուհետև կրթօջախի սաները հանդես եկան օրվա խորհուրդը լրացնող բեմադրությամբ, գրական-գեղարվեստական կատարումներով:

Հատուկ համարով հանդես եկավ նաև դպրոցի երգչախումը, որի գեղարվեստական ղեկավարն է «Երաժշտություն» առարկայի ուսուցչուհի Թամարա Հովհաննիսյանը:

Միջոցառման ավարտին դպրոցի շրջանավարտները, ովքեր նույնպես ներկա էին միջոցառմանը, դահլիճից սկսեցին երգել Բարսեղ Կանաչյանի «Գինի լից» երգը: Ներկաների խանդավառությունը ևս մեկ անգամ փաստեց, որ հայը միշտ պահանջատեր է,  շարունակելու է միշտ հիշել ու պահանջել:

Նախորդ դարասկզբին տեղի ունեցած ցեղասպանությունն իր անջնջելի հետքը թողեց հետագա բոլոր սերունդների հիշողություններում: Այսօր էլ իրադարձությունները վերստին փաստում են, որ Հայոց ցեղասպանության ճանաչումը և դատապարտումն անհրաժեշտություն են՝ տևական խաղաղություն ու կայունություն ապահովելու համար:

Ոգեկոչելով Հայոց մեծ եղեռնի սրբադասված նահատակների հիշատակը՝ գիտակցում ենք, որ միայն մեր գոյությամբ կարող ենք հաղթահարել չսպիացող վերքի ցավը, որ վերապրողների ժառանգներիս պարտքն է համախմբվել, հավատարիմ մնալ մեր արժեքներին ու ինքնությանը՝ կերտելով համայն հայության հզոր հայրենիք:

Միջոցառմանը ներկա էին ուսումնական գծով փոխտնօրեն Սերգեյ Ավանեսյանը, դաստիարակչական աշխատանքների կազմակերպիչ Արմիդա Գևորգյանը, ուսուցիչներ, աշակերտներ, ծնողներ: