Դեկտեմբերի 1-ին Գորիսի Յու. Բախշյանի անվան թիվ 3 հիմնական դպրոցի 2-րդ «Գ» դասարանում տեղի ունեցավ աշնանը նվիրված «Ոսկեծամիկ աշուն» խորագիրը կրող բաց դաս-միջոցառում, որը կազմակերպել էր դասվար Արմինե Հարությունյանը: Աշնանային այգու գողտրիկ անկյուն հիշեցնող դասասենյակը զարդարված էր բազմագույն ու խայտաբղետ թուփ ու տերևներով: Ներկաներին, կարծես, կախարդական խորհուրդ էր պարուրել:
Բաց դաս-միջոցառումը սկսվեց աշնանը նվիրված երգով ու հանելուկով: Այնուհետև մասնակիցները ներկայացրին աշնանային բնության փոփոխությունների, ոսկեհեր անտառի, այգիների հարուստ բերք ու բարիքի մասին ստեղծագործություններ, և ավարտեցին միջոցառումը գեղեցիկ պար-բեմադրությամբ: Աշակերտներն ակնհայտ ոգևորվածությամբ գովերգեցին գունաշատ գեղեցկուհուն, հանդես եկան աշնան վերաբերյալ երգերով, բանաստեղծություններով: Արդեն հրաժեշտ տվող աշունը, երեխաների պատկերացումներով, ավելի ջերմ ու ոսկեղենիկ էր: Բաց դաս-միջոցառմանը ներկա էին դպրոցի ուսումնական գծով փոխտնօրեն Սերգեյ Ավանեսյանը, ՄԿՈւ գծով փոխտնօրեն Աիդա Անտոնյանը, դաստիարակչական աշխատանքների կազմակերպիչ Արմիդա Գևորգյանը, Տարրական դասարանների մեթոդմիավորման նախագահ Վարդ Գրիգորյանը, ծնողներ:
| |
|
| |
| Դիտումներ: 581 | |
| Մեկնաբանություններն ընդամենը՝: 0 | |