Նոյեմբերի 10–19-ը Գորիսի Յուրի Բախշյանի անվան թիվ 3 հիմնական դպրոցի նախաձեռնությամբ և ԿԶՆԱԿ-ի կողմից սահմանված մենթորական ծրագրի շրջանակում կազմակերպվել է «Քննադատական մտածողություն» թեմայով երկօրյա վերապատրաստման դասընթաց։ Դասընթացը վարել է մենթոր Հասմիկ Սանթրյանը, իսկ կազմակերպչական աշխատանքներն իրականացվել են տնօրենի պաշտոնակատար Սերգեյ Ավանեսյանի համակարգմամբ։

Վերապատրաստմանը մասնակցել են Գորիսի կրթագոտու 15 դպրոցների 90 ուսուցիչներ՝ հնարավորություն ստանալով ներկայացված թեման ուսումնասիրել թե՛ տեսական, թե՛ գործնական հարթություններում։

Դասընթացի ընթացքում մասնակիցներին ներկայացվել են քննադատական մտածողության ձևավորման և զարգացման հիմունքները, ժամանակակից մոտեցումներն ու կիրառական մեթոդները։ Բացի տեսական նյութից, կազմակերպվել են խմբային քննարկումներ, իրավիճակային վարժություններ և գործնական գործունեություններ, որոնք նպաստել են մասնակիցների ներգրավվածության բարձրացմանը։ Այս ձևաչափն ապահովել է միջավայր, որտեղ ուսուցիչները կարողացել են վերլուծել կրթական խնդիրները տարբեր դիտանկյուններից, փոխանակել մասնագիտական փորձը և ստանալ արդյունավետ լուծումներ առաջարկող խորհուրդներ։

Ուսուցման արդյունավետության գնահատման նպատակով վերապատրաստման սկզբում և ավարտին իրականացվել են նախաթեստ և վերջնաթեստ։ Թեստավորումը իրականացվել է ինքնաշխատ եղանակով, ինչը հնարավորություն է տվել արագ ամփոփել արդյունքները և գնահատել մասնակիցների առաջընթացը։ Վերլուծությունները ցույց են տվել, որ ուսուցիչները զգալիորեն բարձրացրել են թեմայի վերաբերյալ իրազեկվածությունն ու մեթոդական պատրաստվածությունը։

Վերապատրաստման արդյունքում ձևավորվել է համագործակցային, ստեղծագործական և փոխաջակցող մթնոլորտ, որտեղ մասնակիցները ձեռք են բերել նոր գործիքներ, կարողություններ և մոտեցումներ՝ ուղղված քննադատական մտածողության խթանմանը դասավանդման գործընթացում։

Վերապատրաստման նպատակները լիովին իրագործվել են․ ուսուցիչները հարստացրել են իրենց մեթոդաբանական գիտելիքները, ընդլայնել մասնագիտական կարողությունները և պատրաստակամ են նոր ձեռքբերումները կիրառել ուսումնական գործընթացում՝ բարձրացնելով ուսուցման որակը։ Այս դասընթացը ևս մեկ անգամ հաստատեց մենթորական ծրագրի արդյունավետությունն ու նրա կարևոր դերը ուսուցիչների շարունակական մասնագիտական զարգացման գործում։