Հարգելի՛ ուսուցիչներ,
Շնորհավորում եմ ձեզ մասնագիտական տոնի՝ Ուսուցչի օրվա առթիվ: Դուք մեծագույն ներդրում ունեք մեր երկրի զարգացման գործում: Դուք ունեք շատ դժվարին, բայց և պատվաբեր առաքելություն` կրթել ու դաստիարակել ապագա սերունդներին, ովքեր կդառնան մեր երկրի արժանի քաղաքացիներ:

Ուսուցիչն է այն մարդը, ում շնորհվել է սերունդներին կրթելու, ազգային մտածելակերպ, հայրենասիրություն սերմանելու վեհ գործը, որպեսզի մենք կարողանանք լինել լիարժեք և գիտակից քաղաքացիներ:

Դուք եք, որ մեր սրտերը արթնացնում եք գիտելիքի լույսով և հեռացնում եք բոլոր տեսակի անգրագիտությունը, մեր կյանքում մեծ գիտելիքներ ու իմաստություն եք հաղորդում, օգնում մեզ կառուցել մեր բնավորության հիմքը, կերպարն ու դերը:

Մեր հերոսներից սերնդեսերունդ փոխանցված հայրենասիրությունն ու քաջությունը բազմապատկվել է նաև ձեր բանիմաց ու նվիրված աշխատանքի շնորհիվ: Դուք սեփական օրինակով սերմանում եք, թե ինչպես է պետք ապրել հայրենիքին արժանի, ինչպես է պետք սիրել ու փայփայել հայրենիքը, ինչպես է պետք բռունցք դառնալ ու պաշտպանել հող հայրենին:

Այսօր մենք ականատես ենք, թե որքան նպատակասլաց ու անպարտ են ձեր երեկվա աշակերտները՝ մեր խիզախ զինվորները, ովքեր ավարտին են հասցնելու Անդրանիկի, Նժդեհի, Չաուշի, Մոնթեի, Թաթուլի, մեր մյուս հերոսների գործը, ովքեր համալրելու են լավագույն գիտնականների, մանկավարժների, շինարարների, ինժեներների, բժիշկների, գործարարների շարքերը:

Բոլոր ժամանակներում էլ ուսուցչի դերակատարությունը նույնն է՝ տալ գիտելիքներ, դաստիարակել, զարգացնել հմտություններ ու կարողություններ:

Պետք է սակայն, հասկանալ, թե կոնկրետ ժամանակաշրջանում և ապագային միտված ո՞ր գիտելիքներն են կարևոր և ինչպիսի՞ հմտություններ ու կարողություններ է անհրաժեշտ զարգացնել: Իսկ դա նշանակում է, որ ուսուցիչն ինքը պիտի փոխվի ժամանակի պահանջներին ու մարտահրավերներին համահունչ և մշտապես լինի ոչ միայն սովորեցնողի, այլև սովորողի դերում: Հենց դրանում է լա՛վ ուսուցիչ լինելու դժվարությունը:

Ուսուցչությունն աշխատանք չէ, որը կատարում են պարզապես աշխատավարձի համար: Ուսուցչությունն առաքելություն է, որը նվիրում է պահանջում: Եվ հենց դրա համար է ասվում, որ ուսուցիչը մասնագիտություն չէ, կոչո՛ւմ է:

Շնորհավորում եմ ձեզ, սիրելի ուսուցիչներ: Գլուխ եմ խոնարհում ձեր առջև: Եվ խնդրում եմ. միշտ ձեր բարձունքի վրա մնացեք: Ձեր փորձն ու գիտելիքները փոխանցեք սկսնակ ուսուցիչներին նույն ծնողական հոգատարությամբ, ինչպես որ վերաբերվում եք ձեր աշակերտներին:

Բոլոր ուսուցիչներին մաղթում եմ առողջություն, անսպառ եռանդ, բարօրություն և անսահման սեր ու ջերմություն: