Գորիսի Յու․Բախշյանի թիվ 3 հիմնական դպրոցի կոլեկտիվը հրաժեշտ տվեց վաստակաշատ մանկավարժ Մարինե Յոլյանին

Նոյեմբերի 28-ին Գորիսի Յու․Բախշյանի թիվ 3 հիմնական դպրոցի կոլեկտիվը հրաժեշտ տվեց սիրված, վաստակաշատ մանկավարժ, «Կենսաբանություն» առարկայի ուսուցչուհի Մարինե Յոլյանին, ով ավարտեց իր մանկավարժական գործունեությունը:

Դպրոցի կոլեկտիվը մեծարման երեկո էր կազմակերպել: Կրթօջախի դահլիճում հավաքվել էին գործընկերները՝ մի անգամ ևս արժևորելու նրա անցած ուղին, նաև  վաստակած հանգստի ճանապարհելու:

  

«Տակավին 22 տարեկան էր, երբ 1984 թվականին ոտք դրեց Գորիսի թիվ 2 միջնակարգ դպրոց: Այնուհետեւ 1994 թվականին տեղափոխվեց Գորիսի թիվ 3 միջնակարգ դպրոցը, որտեղ աշխատեց մինչև իր մանկավարժական գործունեության ավարտը: Զուգահեռ աշխատեց Գ. Սամսոնիչի անվան բժշկական ուսումնարանում, Կրթության ազգային ինստիտուտում:

Մարինե Յոլյանը հոգու ջերմությունը փոխանցել է իր սաներին, իսկ գործընկերների հետ ունեցել ջերմ ու մարդկային հարաբերություններ: Նա իր մանկավարժական հմտությամբ կարողացել է թափանցել սաների ներաշխարհը, գտնել նրանց ունակությունները: Միշտ եղել է պարտաճանաչ, աշխատել է անմնացորդ նվիրումով», - այսպես ներկայացրեց երկարամյա մանկավարժին դպրոցի տնօրեն Դավիթ Կոստանդյանը:

Բարեխիղճ աշխատանքի, մատաղ սերնդի կրթության, դաստիարակության գործում ունեցած ավանդի համար Մարինե Յոլյանը պարգևատրվեց տնօրենի շնորհակալագրով:

Միջոցառման ավարտին Մարինե Յոլյանը երախտագիտություն հայտնեց գնահատանքի խոսքերի և բարի ցանկությունների համար:

Գորիսի Յու. Բախշյանի անվան թիվ 3 հիմնական դպրոցի անձնակազմը շնորհակալություն է հայտնում Մարինե Յոլյանին` դպրոցում երկարամյա վաստակի համար:

  
  

Կատեգորիա: ՊԱՇՏՈՆԱԿԱՆ | Ավելացրեց: ԽՄԲԱԳԻՐ (29.11.2022)
Դիտումներ: 1016 | Վարկանիշ: 0.0/0
Մեկնաբանություններն ընդամենը՝: 0
avatar