Մայիսի 13-ին Գորիսի Յուրի Բախշյանի անվան թիվ 3 հիմնական դպրոցում տոնական և ջերմ մթնոլորտ էր տիրում։ 2-րդ «Բ» դասարանի սաները, «Ռուսաց լեզու» առարկայի ուսուցչուհի Մարիամ Հայրապետյանի նախաձեռնությամբ, ներկայացան իրենց առաջին նշանակալի ձեռքբերումներից մեկով՝ «Прощай, Букварь!» խորագրով գեղեցիկ միջոցառմամբ։

Տոնի ընթացքում փոքրիկները մեծ ոգևորությամբ և հուզմունքով հանդես եկան բանաստեղծություններով, երգերով ու պարերով՝ ցուցադրելով իրենց ձեռք բերած հմտությունները։ Նրանք ուրախությամբ ներկայացան որպես արդեն գրաճանաչ ու ռուսերենով հաղորդակցվելու կարողություն ունեցող աշակերտներ։ Նրանց վստահ ելույթները վկայում էին ուսուցչուհու նվիրված աշխատանքի ու սիրով իրականացված կրթության մասին։

Միջոցառման ընթացքում աշակերտներին միացան նաև անակնկալ հյուրեր։ Նրանց թվում էր հայտնի հեքիաթային կերպար Բուրատինոն, որը զարմանքով ու հիացմունքով հետևեց փոքրիկների խոսքերին ու կատարումներին։ Տպավորված նրանց գիտելիքներով՝ նա ևս ցանկություն հայտնեց դպրոց հաճախել ու սովորել։

Տոնի հատուկ հյուրն էր նաև սիրելի «Букварь»-ը՝ իրենց ուղեկից գիրքը, որը խորհրդանշում է ուսուցման առաջին ու հիմնարար քայլը։ Նա ջերմ բարեմաղթանքներ հղեց աշակերտներին, շնորհավորեց նրանց գրաճանաչ դառնալու առթիվ և ոգևորեց նոր բացահայտումների ճանապարհին։

Այս անմոռանալի միջոցառումը վառ արտահայտությունն էր այն մեծ սիրո, նվիրումի ու հոգատար աշխատանքի, որով դասվարն ուղեկցել է իր սաներին դեպի գիտելիքի աշխարհ։

Շնորհավորում ենք 2-րդ «Բ» դասարանի բոլոր աշակերտներին և ուսուցչուհի Մարիամ Հայրապետյանին՝ այս լուսավոր ու հուզիչ օրվա կապակցությամբ։ Մաղթում ենք նրանց շարունակական առաջընթաց, ոգևորություն և հաջողություններ ուսումնառության հետագա փուլերում։