Գորիսի Յուրի Բախշյանի անվան թիվ 3 հիմնական դպրոցի 8-րդ «Գ» դասարանի աշակերտներն իրենց ծնողների ուղեկցությամբ Վայոց ձորի գողտրիկ բնության գրկում անցկացրին հիշարժան ու հարստացնող օր: Ուսումնական-ճանաչողական շրջագայության ընթացքում նրանք այցելեցին Հայաստանի պատմաճարտարապետական գոհարներից մեկը՝ Նորավանքի վանական համալիրը, որը եզակի է իր շքեղ զարդանախշերով և ժայռերի գագաթին թառած դիրքով։ Այնուհետև աշակերտները եղան Արենիի քարանձավում՝ հնագույն գինեգործական համալիրում, որն աչքի է ընկնում մարդկության պատմության կարևորագույն գտածոներով։ Օրը եզրափակվեց ջրաշխարհի զվարճալի և ակտիվ ժամանցով։ Բացի մշակութային և պատմական արժեքների բացահայտումից, աշակերտները մասնակցեցին թեմատիկ բաց քննարկումների՝ նվիրված հայրենիքին, ազգային ինքնության պահպանմանը, բնության պահպանման նշանակությանը և պետության դերին։ Մթնոլորտը ջերմ ու խանդավառ էր՝ լի հետաքրքիր հարց ու պատասխաններով, մտքերով և եզրահանգումներով։ Այս յուրօրինակ բաց դասը ոչ միայն խթանեց տեսական գիտելիքների գործնական կիրառումը, այլև ամրապնդեց աշակերտների հոգևոր կապը հայրենիքի, ազգային արժեքների ու մշակութային ժառանգության հետ։ Ճանապարհորդությունն ավարտվեց նոր տպավորություններով, ջերմ հիշողություններով և հայրենիքը առավել սիրելու ներքին ձգտումով:
| |
|
| |
| Դիտումներ: 153 | |
| Մեկնաբանություններն ընդամենը՝: 0 | |