Գորիսի Յուրի Բախշյանի անվան թիվ 3 հիմնական դպրոցի 6-րդ «Ա» դասարանի աշակերտները, դասղեկ` Արփինե Մարտիրոսյանի և ծնողների ուղեկցությամբ մասնակցեցին ճանաչողական էքսկուրսիայի՝ այցելելով հայրենի եզերքի պատմամշակութային գոհարներ։ Առաջին կանգառը Զորաց քարեր հնագիտական համալիրն էր՝ խորհրդավոր քարե մեգալիթները, որոնք դարերի խորքից հուշում էին մարդկության նախնադարյան գիտելիքների ու աշխարհի ընկալման մասին։ Երեխաները մեծ հետաքրքրությամբ լսում էին հուշարձանի մասին պատմող լեգենդներն ու գիտական բացատրությունները։ Այնուհետ ճանապարհը շարունակվեց դեպի Արենիի գինու գործարան, որտեղ աշակերտները ծանոթացան գինու պատրաստման ավանդույթներին և տեխնոլոգիային։ Գինու սրահի օդը հագեցած էր խաղողի բույրով ու տարիների իմաստությամբ։ Երեխաները ուրախությամբ մասնակցեցին գործարանի փոքրիկ շրջայցին՝ հասկանալով, թե ինչպես է խաղողից ծնվում աշխարհահռչակ հայկական գինին։ Այցելությունը շարունակվեց Արենիի քարանձավում՝ հնագետների հայտնագործած հնագույն գինեգործական համալիրում։ Քարանձավի զով պատերի տակ աշակերտները զգացին պատմության շունչը՝ կարծես քայլելով հազարավոր տարիների միջով։ Էքսկուրսիայի գագաթնակետն էր Նորավանքը՝ կարմրավուն ժայռերի գրկում ծաղկող հայ ճարտարապետության հրաշալի մարգարիտը։ Վանքային համալիրը զարմացրեց աշակերտներին իր նուրբ քանդակներով, շքեղ գեղագիտական լուծումներով ու հոգևոր մթնոլորտով։ Սուրբ վայրի լռության մեջ երեխաները հնչեցրին ազգային երգեր, որոնք մաքուր արձագանքում էին վանքի կամարներում։ Ողջ օրվա ընթացքը հագեցած էր նաև երգ ու պարով։ Ճանապարհին հնչում էին հայրենասիրական երգեր, իսկ կանգառների ժամանակ աշխույժ պարերը ստեղծում էին ուրախ ու անմոռանալի տրամադրություն։ Այսպիսի ճանաչողական այցերը ոչ միայն հարստացնում են աշակերտների գիտելիքների պաշարը, այլև ամրապնդում են հայրենասիրական զգացմունքները՝ ծանոթացնելով նրանց մեր մշակույթի անջնջելի ժառանգությանը։
| |
|
| |
| Դիտումներ: 245 | |
| Մեկնաբանություններն ընդամենը՝: 0 | |