Գորիսի Յուրի Բախշյանի անվան թիվ 3 հիմնական դպրոցի աշակերտները, դպրոցի տնօրենի պաշտոնակատար Սերգեյ Ավանեսյանի, ՄԿԱ գծով համակարգող Արմիդա Գևորգյանի, ինչպես նաև դասղեկների, ուսուցիչների և ծնողների ուղեկցությամբ, այցելեցին Գորիսի պետական դրամատիկական թատրոն՝ դիտելու Սոս Սարգսյանի անվան համազգային թատրոնի հյուրախաղային ներկայացումը։ Բեմում ցուցադրվեց ՀՀ վաստակավոր արտիստ Դավիթ Հակոբյանի բեմադրած «…իսկ դրսում ձյու՜ն է գալիս» կատակերգական ներկայացումը։ Գլխավոր դերերում հանդես եկան Արման Նավասարդյանը, Վարշամ Գևորգյանը և Ստեփան Ղամբարյանը, իսկ փոքրիկ դերով ներկայացմանը մասնակցեց նաև հենց ռեժիսորը՝ Դավիթ Հակոբյանը։ Ներկայացումը, որ համեմված էր հումորով և մարդկային անկեղծությամբ, հանդիսատեսին պարգևեց բարձր տրամադրություն ու մտորելու առիթ։ Աուտիզմ կամ պարանոյա հիվանդությամբ տառապող Չիկոն՝ պատմության գլխավոր հերոսը, իր յուրահատուկ աշխարհում եղբայրներին ստիպում է տունը վերածել խաղահրապարակի։ Անդադար ծիծաղ առաջացնող կոմեդիան անսպասելիորեն ավարտվում է դրամատիկ նոտայով՝ հիշեցնելով, որ թատերական արվեստը միայն զվարճանք չէ, այլ նաև հոգևոր զարթոնք։ Բախշյանականները թատրոնից հեռացան լեցուն տպավորություններով՝ վերապրելով ներկայացման հերոսների հույզերն ու բացահայտելով բեմի կախարդանքը։
| |
|
| |
| Դիտումներ: 184 | |
| Մեկնաբանություններն ընդամենը՝: 0 | |