Հունվարի 29-ին Գորիսի Յուրի Բախշյանի անվան թիվ 3 հիմնական դպրոցում անցկացվեց բաց դաս-ցուցադրություն և գործնական վարժանք-ցուցադրություն՝ «Ճանաչենք մեր դպրոցը․ անվտանգ մուտք և ելք» թեմայով։ Միջոցառումը կազմակերպվել էր դպրոցի Արվեստի, ֆիզիկական կրթության և անվտանգ կենսագործունեության մեթոդմիավորման նախագահ Աննա Աբգարյանի և «ՆԶՊ» առարկայի ուսուցիչ Արտուր Հովսեփյանի նախաձեռնությամբ։ Դասի ընթացքում սովորողները և մանկավարժական անձնակազմը ծանոթացան անվտանգության հիմնական կանոններին, արտակարգ իրավիճակներում վարքագծի ձևերին, ինչպես նաև տարհանման գործող սխեմային։ Գործնական վարժանքները նպատակ ունեին զարգացնել սովորողների պատրաստվածությունը հնարավոր վտանգավոր իրավիճակներում և ամրապնդել անվտանգության մշակույթը դպրոցական միջավայրում։ Միջոցառմանը մասնակցեցին ՀՀ ներքին գործերի նախարարության փրկարար ծառայության Սյունիքի մարզային փրկարարական վարչության Գորիսի հրշեջ-փրկարարական ջոկատի ներկայացուցիչները։ Նրանք ներկայացրին բնական աղետների և ճանապարհատրանսպորտային պատահարների ժամանակ կիրառվող հատուկ սարքավորումներն ու տեխնիկան, ինչպես նաև սովորողներին ծանոթացրին փրկարար ծառայության ավտոմեքենայի հնարավորություններին և գործառույթներին։ Գորիսի Յուրի Բախշյանի անվան թիվ 3 հիմնական դպրոցի տնօրենի պաշտոնակատար Սերգեյ Ավանեսյանն իր խոսքում շնորհակալություն հայտնեց ՀՀ ներքին գործերի նախարարությանը՝ արդյունավետ համագործակցության համար, ինչպես նաև փրկարար ծառայության ներկայացուցիչներին՝ շարունակական աջակցության և կրթական գործընթացում ունեցած կարևոր ներդրման համար՝ ընդգծելով նման միջոցառումների կարևորությունը սովորողների անվտանգության գիտակցության ձևավորման գործում։
| |
|
| |
| Դիտումներ: 147 | |
| Մեկնաբանություններն ընդամենը՝: 0 | |