Դեկտեմբերի 6-ին Գորիսի Յուրի Բախշյանի անվան թիվ 3 հիմնական դպրոցում տեղի ունեցավ վիկտորինա՝ «Անգլերեն» առարկայից, որը կազմակերպել էին «Անգլերեն» առարկայի ուսուցչուհի Թագուհի Գրիգորյանն ու Գորիսի պետական համալսարանի «Անգլերեն լեզու և գրականություն» մասնագիտության ուսանողներ Լիլիթ Հովհաննիսյանն ու Սեդա Առաքելյանը, որոնք իրենց պրակտիկան անց են կացնում դպրոցում։

Վիկտորինային մասնակցում էին դպրոցի 8-րդ «Ա», «Բ», «Գ» և 9-րդ «Ա», «Բ» դասարանների աշակերտներից կազմված խմբերը։ 8-րդ «Ա» դասարանի աշակերտների խումբը կրում էր «Bright Minds» անունը, 8-րդ «Բ» դասարանի աշակերտների խումբը՝ «English Eagles» անունը, 8-րդ «Գ» դասարանի աշակերտների խումբը՝ «The Leaders» անունը, 9-րդ «Ա» դասարանի աշակերտների խումբը՝ «School gladiators» անունը և 9-րդ «Բ» դասարանի աշակերտների խումբը՝ «School Scholars» անունը։

Վիկտորինան կազմված էր 4 փուլից։ 1-ին փուլի՝ «Famous Faces Challenge»-ի ընթացքում աշակերտները պետք է գուշակեին հայտնի մարդկանց։ 2-րդ փուլի՝ «Choose your challenge»-ի ընթացքում աշակերտները պատասխանեցին թվերի տակ թաքնված հարցերին։  3-րդ փուլի՝ «The Secret Word»-ի ընթացքում աշակերտները թվերի միջոցով գտան բառը՝ «Friendship»: Վերջին՝ 4-րդ փուլի՝ «Lucky Wheel»-ի ընթացքում եզրափակիչ փուլ անցած երկու թիմերը ընտրեցին 2 թեմա և բանավոր ներկայացրին դրանք։ Ժյուրիի որոշմամբ ընտրվեց հաղթող թիմը։

Չորս փուլերի արդյունքներով վիկտորինայի հաղթող ճանաչվեց 8-րդ «Ա» դասարանի աշակերտներից կազմված «Bright Minds» խումբը։ 2-րդ և 3-րդ տեղերը զբաղեցրին, համապատասխանաբար, 8-րդ «Գ» դասարանի աշակերտներից կազմված «The Leaders» և 9-րդ «Բ» դասարանի աշակերտներից կազմված «School Scholars» խմբերը։

Բոլոր փուլերի հարցերը կազմված էին դպրոցական ծրագրից։

Վիկտորինան ուսանողների վեցշաբաթյա պրակտիկայի ամփոփումն էր։

Դպրոցի տնօրենի պաշտոնակատար Սերգեյ Ավանեսյանը շնորհակալություն հայտնեց կազմակերպիչներին՝ հիանալի կազմակերպված վիկտորինայի համար։

Վիկտորինային ներկա էին Գորիսի պետական համալսարանի Օտար լեզուների ամբիոնի վարիչ Լիանա Օհանյանը, դասախոսներ Նաիրա Սաֆարյանը և Նաիրա Մեժլումյանը, որոնք շնորհակալություն հայտնեցին դպրոցի տնօրինությանը՝ բարձր մակարդակով կազմակերպված պրակտիկայի համար, շեշտեցին, որ ուսանողները միշտ շատ գոհ են լինում Գորիսի Յուրի Բախշյանի անվան թիվ 3 հիմնական դպրոցում անցկացված իրենց պրակտիկայից։