Գորիսի Յուրի Բախշյանի անվան թիվ 3 հիմնական դպրոցը ներառվել է ՀՀ կառավարության «300 դպրոց և 500 մանկապարտեզ» խոշորածավալ պետական ծրագրում, որի շրջանակում նախատեսված է դպրոցի ամբողջական կապիտալ վերանորոգում։

Վերանորոգման աշխատանքներն արդեն մեկնարկել են։ Ծրագրով նախատեսված է դպրոցի ամբողջական արդիականացում՝ ներառյալ տանիքի, ջրահեռացման, ջրամատակարարման և ջեռուցման համակարգերի ամբողջական նորացում։ Բարեկարգվելու է նաև դպրոցի բակային հատվածը, կկառուցվի նոր ցանկապատ, ստեղծելով առավել ապահով և բարենպաստ միջավայր երեխաների համար։

Դպրոցն ամբողջությամբ վերազինվելու է անհրաժեշտ ժամանակակից ուսումնական սարքավորումներով։ Մասնավորապես՝ նախատեսված է բնագիտական առարկաների՝ աշխարհագրության, ֆիզիկայի, քիմիայի և կենսաբանության լիովին կահավորված լաբորատորիաների ստեղծում։ Բացի այդ, դպրոցում կհիմնադրվի ՏՀՏ ժամանակակից և հագեցած կաբինետ, կկառուցվեն ժամանակակից պահանջներին համապատասխանող մեծ և փոքր նիստերի դահլիճներ, ինչպես նաև տաք սննդի տրամադրման համար նախատեսված նոր խոհանոց։

Վերանորոգման ծրագրով նախատեսվում է նաև դպրոցի գույքի ամբողջական փոփոխություն։ Կթարմացվեն աշակերտական սեղան-աթոռները, գրատախտակները և անհրաժեշտ բոլոր կահույքն ու տեխնիկական միջոցները։

Անառարկելի է, որ տեխնիկական վերազինումը և նյութատեխնիկական բազայի զարգացումը էական ազդեցություն է ունենալու դպրոցի կրթական որակի վրա։ Ժամանակակից լաբորատորիաներն ու ՏՀՏ կաբինետը կստեղծեն գործնական ուսուցման նոր հնարավորություններ՝ խթանելով աշակերտների հետաքրքրությունը գիտության նկատմամբ և ձևավորելով կիրառական հմտություններ։ Նոր սարքավորումները կբարձրացնեն դասերի արդյունավետությունը, իսկ հարմարավետ, բարեկարգ պայմանները կխթանեն աշակերտների և ուսուցիչների աշխատելու մոտիվացիան։

Նյութատեխնիկական բազայի շարունակական կատարելագործումը դպրոցում կնպաստի ոչ միայն տեսական, այլև գործնական գիտելիքների խորացմանը, կբարձրացնի ուսումնառության նկատմամբ հետաքրքրությունը, և, ինչն առավել կարևոր է, կստեղծի հավասար կրթական հնարավորություններ բոլոր աշակերտների համար։

Այս ծրագրի իրագործումը հիմք է դնելու ավելի որակյալ, անվտանգ և նորարար միջավայրի ձևավորմանը, որտեղ ուսուցումը կդառնա ավելի արդյունավետ, հետաքրքիր և ժամանակակից պահանջներին համապատասխան։

Այս ամենի արդյունքում Գորիսի Յուրի Բախշյանի անվան թիվ 3 հիմնական դպրոցը կդառնա ավելի հարմարավետ, ժամանակակից և անվտանգ կրթօջախ, որտեղ սովորելն ու աշխատելը կլինի ավելի արդյունավետ և հետաքրքիր։