Նոր ուսումնական տարվան ընդառաջ Սյունիքի մարզում անցկացվել է ավանդական օգոստոսյան խորհրդակցությունը, որին մասնակցել են մարզի հանրակրթական դպրոցների տնօրեններ, տնօրենի տեղակալներ, վարչատնտեսական մասի համակարգողներ և մեթոդմիավորումների նախագահներ։ Խորհրդակցությանը ներկա էին նաև ՀՀ ԿԳՄՍ նախարարի տեղակալ Արաքսիա Սվաջյանը, Սյունիքի մարզպետի տեղակալ Հայկ Հարությունյանը, ինչպես նաև ԿԳՄՍ նախարարության, «ԿԶՆԱԿ» հիմնադրամի և մարզպետարանի աշխատակազմի ներկայացուցիչներ։ Քննարկվել են նոր ուսումնական տարվա կազմակերպչական, ուսումնական պլանների, խմբակային և նախագծային աշխատանքների իրականացման վերաբերյալ հարցեր։ Միջոցառմանը նախորդել էր «Կրթական էքսպո» ցուցահանդեսը, որտեղ ներկայացվել էին Սյունիքի դպրոցների աշակերտների կողմից նախորդ ուսումնական տարում իրականացված լավագույն նախագծային աշխատանքները։
Ցուցահանդեսին իր ակտիվ մասնակցությունն է ունեցել նաև Գորիսի Յուրի Բախշյանի անվան թիվ 3 հիմնական դպրոցը, որը ներկայացրել էր 24 նախագծային աշխատանքի արդյունքներ։ Աշակերտներ Լիլի Մալինցյանն ու Միլենա Մելքումյանն այցելուներին ներկայացրել էին նախագծային աշխատանքների արդյունքում իրակնացված պրոդուկտները։ Մասնավորապես, նրանք ցուցադրել են նախագծային աշխատանքի շրջանակում ստեղծված հայկական ազգային տարազը, որն արժանացել է մասնակիցների հետաքրքրությանը։ Դպրոցի ներկայացուցիչները մանակցել են խորհրդակցությանը։ Նրանք կարևորել են դպրոցի ներգրավվածությունը թե՛ կրթական ցուցահանդեսում, թե՛ խորհրդակցության աշխատանքներում՝ ընդգծելով աշակերտների ստեղծագործական ներուժի զարգացումը և նախագծային ուսուցման ընդլայնման անհրաժեշտությունը։ Օգոստոսյան խորհրդակցությունը դարձյալ հարթակ է դարձել մարզի կրթական համակարգի ձեռքբերումները ներկայացնելու և առաջիկա ուսումնական տարվա մարտահրավերներն ու ծրագրերը համատեղ քննարկելու համար։
| |
|
| |
| Դիտումներ: 160 | |
| Մեկնաբանություններն ընդամենը՝: 0 | |