Գորիսի Յուրի Բախշյանի անվան թիվ 3 հիմնական դպրոցի 6-րդ «Ա» դասարանում բաց դաս էր «Մաթեմատիկա» առարկայից՝ «Տոկոսներ» թեմայով։

Դասարանը բաժանվեց խմբերի, և յուրաքանչյուր խումբ ընտրեց իր անվանումը։ Աշակերտները ներկայացրին իրենց թիմի անվանման ընտրությունը, ինչը հնարավորություն տվեց լսել նրանց հետաքրքիր և տրամաբանական բացատրությունները։

Դասի հաջորդ փուլում աշակերտներն ակտիվ երկխոսություն սկսեցին տոկոսի կիրառման վերաբերյալ։ Նրանք քննարկեցին, թե որտեղ և ինչպես են օգտագործվում տոկոսները մեր կյանքում, ինչպիսի կարևորություն ունեն դրանք տարբեր ոլորտներում՝ ֆինանսներից մինչև առօրյա կյանք։ Նրանք ներկայացրին հայտնի մարդկանց արտահայտություններ տոկոսի մասին և կապեցին դրանք կյանքի տարբեր իրավիճակների հետ։ Այդ ընթացքում քննարկվեցին տարբեր պատմություններ, որոնք ցույց էին տալիս տոկոսի դերը հայտնի մարդկանց հաջողության պատմություններում։

«Մաթեմատիկա» առարկայի ուսուցչուհի Արփինե Մարտիրոսյանը հանդես եկավ մի շարք հետաքրքրաշարժ հարցերով, որոնք ոգևորեցին աշակերտներին։ Նրանք հաջողությամբ պատասխանեցին այդ հարցերին, ինչը ցույց տվեց նրանց գիտելիքների խորությունն ու պատրաստվածությունը։

Դասի կարևորագույն փուլերից մեկը թվաբանական ճանապարհորդությունն էր, որը բաղկացած էր 5 կանգառից։ Աշակերտները փուլ առ փուլ լուծեցին տոկոսի խնդիրներ՝ հասնելով մեծագույն հաղթանակին՝ ՀՀ եռագույնին։ Աշակերտները խոսեցին ՀՀ խորհրդանիշների մասին, հնչեց օրհներգը։

Որպես ամրապնդման փուլ անցկացվեց թիմային ինտելեկտուալ «Quizziz» խաղը։

Այս դասը հիանալի օրինակ էր, թե ինչպես կարելի է ուսուցումը դարձնել հետաքրքիր, դինամիկ և հիշարժան։ Աշակերտները, իրենց ձեռք բերած գիտելիքներով, համոզվեցին, որ տոկոսի կիրառումը չի սահմանափակվում միայն մաթեմատիկայով, այլ կարևոր է կյանքի տարբեր ոլորտներում՝ օգնելով հասնել հաջողության։

Այսպիսի դասերը ոչ միայն զարգացնում են աշակերտների մաթեմատիկական հմտությունները, այլև նրանց մեջ ձևավորում են ինքնավստահություն, հայրենասիրություն և թիմային մտածողություն։