Գորիսի Յուրի Բախշյանի անվան թիվ 3 հիմնական դպրոցի 7-րդ «Ա» դասարանի աշակերտները, ծնողների և դասղեկ Շահանե Հովսեփյանի ուղեկցությամբ, իրականացրին ճանաչողական և կրթական նշանակություն ունեցող էքսկուրսիա դեպի Նորավանք վանական համալիր և Ջերմուկ քաղաք։

Էքսկուրսիայի գլխավոր նպատակն էր խթանել աշակերտների հայրենաճանաչողությունը, սերմանել պատմամշակութային ժառանգության հանդեպ սեր ու հետաքրքրություն։ Ճանապարհի ողջ ընթացքում դասղեկը և ծնողները աշակերտների հետ զրուցում էին այցելվող վայրերի նշանակության, պատմության և մշակութային արժեքների շուրջ՝ վերածելով այցն ուսուցողական գործընթացի շարունակության։

Առաջին կանգառը Նորավանք վանական համալիրն էր՝ Վայոց ձորի զարմանահրաշ կիրճում թաքնված հայ ճարտարապետության գոհարը։ Այստեղ աշակերտները ծանոթացան 13-րդ դարի շինարվեստի առանձնահատկություններին, տեղեկացան նշանավոր ճարտարապետ Մոմիկի գործունեության մասին և հիացան կարմիր ապարով կազմված ժայռերի յուրօրինակ գեղեցկությամբ։

Ճանապարհը շարունակվեց դեպի Ջերմուկ՝ առողջարանային քաղաք, որը հայտնի է իր բնական բուժիչ աղբյուրներով, հրաշագեղ ջրվեժներով և մաքուր օդով։ Այցելեցին «Ջրի պատկերասրահ», որտեղ աշակերտները հնարավորություն ունեցան համտեսելու տարբեր ջրերի համերը և ծանոթանալու դրանց բուժիչ հատկություններին։ Նրանք նաև ականատես եղան բնական գեյզերի ժայթքմանը, որից հետո զբոսնեցին «Ջերմուկի ձորով», վայելելով բնության անդորրն ու գեղատեսիլ տեսարանները։

Էքսկուրսիան անցավ հաճելի, ջերմ ու մտերմիկ մթնոլորտում՝ համատեղելով ուսուցումը հանգստի և համերաշխության հետ։ Աշակերտները ոչ միայն հարստացրին իրենց գիտելիքներն ու տպավորությունները, այլև խորը կապ ստեղծեցին իրենց հայրենիքի պատմության, մշակույթի ու բնության հետ։

Այսպիսի նախաձեռնությունները կարևոր են ոչ միայն գիտելիքներ հաղորդելու, այլև աշակերտների աշխարհայացքի ձևավորման, հայրենասիրության ամրապնդման և հոգևոր դաստիարակության տեսանկյունից։