Սեպտեմբերի 25-ին Գորիսի Յուրի Բախշյանի անվան թիվ 3 հիմնական դպրոցում, ՀՀ կրթության, գիտության, մշակույթի և սպորտի նախարարության աջակցությամբ, իրականացվեց կրթամշակութային «ԴասԱրվեստ» ծրագիրը։

Դասընթացին մասնակցեցին 5-9-րդ դասարանների աշակերտները, որոնք «Վարպետը և ծովը» թեմատիկ ծրագրի շրջանակում հնարավորություն ունեցան ծանոթանալու համապատասխան ստեղծագործություններին։ Հայաստանի ազգային պատկերասրահի մասնագետների կողմից անցկացված դասախոսությունն ու ցուցադրությունները հնարավորություն տվեցին աշակերտներին բացահայտելու կերպարվեստի աշխարհի բազմազանությունը։

Ծրագրի ընթացքում երեխաները ոչ միայն ծանոթացան հայկական կերպարվեստի խոշորագույն ներկայացուցիչների կյանքին ու ստեղծագործություններին, այլև ձեռք բերեցին տարրական գիտելիքներ կերպարվեստի տեսակների, ժանրերի, գեղանկարչության և գրաֆիկայի տեխնիկայի, ինչպես նաև կիրառվող նյութերի մասին։ Բացի այդ, նրանք հետաքրքիր տեղեկություններ ստացան թանգարանագետի և արվեստաբանի մասնագիտությունների առանձնահատկությունների վերաբերյալ։

Այս նախաձեռնությունը մեծապես նպաստեց դպրոցական կրթական գործընթացի հարստացմանը․ աշակերտները ոչ միայն ընդլայնեցին իրենց գիտելիքները արվեստի ոլորտում, այլև բացահայտեցին Հայաստանի ազգային պատկերասրահի՝ հայկական կերպարվեստի հավաքածուներով աշխարհում ամենամեծ թանգարանային կենտրոններից մեկի պատմությունը։

«ԴասԱրվեստ» ծրագրի գլխավոր նպատակն է կամրջել թանգարաններն ու կրթական հաստատությունները՝ ամրապնդելով կրթության և արվեստի կապը։ Այն ուղղված է նաև թանգարանային գործունեության ապակենտրոնացմանը, ինչը թույլ է տալիս մշակութային արժեքները հասանելի դարձնել ոչ միայն մայրաքաղաքում, այլև մարզերում սովորող երեխաներին։

Այսպիսի ծրագրերը կարևոր ներդրում են մշակութային կրթության զարգացման գործում և նպաստում են լայն աշխարհայացք ունեցող, ստեղծագործական մտածողությամբ նոր սերնդի ձևավորմանը։