Սեպտեմբերի 25-ին Կապան քաղաքում կայացավ «ֆիզկուլտուրա» առարկայի ստուգատեսի մարզային փուլը, որը համախմբեց Սյունիքի մի շարք դպրոցների 4-6-րդ դասարանների աշակերտներին։ Մրցույթին իրենց մասնակցությունն ունեցան Կապանի թիվ 1, 3, 5, 6, 11 հիմնական դպրոցների, Քաջարանի թիվ 1, Լեռնաձորի, ինչպես նաև Գորիսի Յուրի Բախշյանի անվան թիվ 3 հիմնական դպրոցի դպրոցականները։ Յուրաքանչյուր դասարան ներկայացված էր երկու աղջիկ և երկու տղա մասնակցով։

Մրցաշարն անցավ ակտիվ ու մարզական ոգով, իսկ պայքարը՝ համառ ու արժանի։ Գորիսի Յուրի Բախշյանի անվան թիվ 3 հիմնական դպրոցի սաները ցուցաբերեցին մեծ ջանք և հավաքական նվիրում․

• 4-5-րդ դասարանները զբաղեցրին 4-րդ տեղը,
• 6-րդ դասարանը՝ 5-րդ տեղը։

Ստուգատեսի հիմնական նպատակներն են․

• խթանել ֆիզկուլտուրայի և սպորտի զարգացումը մատաղ սերնդի շրջանում՝ ապահովելով նրանց ներդաշնակ դաստիարակություն,
• դպրոցականների կյանքում ամրապնդել առողջ ապրելակերպի մշակույթը և ձևավորել հայրենիքի պաշտպանությանը պատրաստ երիտասարդություն,
• իրականացնել աշակերտների ֆիզիկական կարողությունների մոնիտորինգ,
• խթանել պետական և տեղական ինքնակառավարման մարմինների, ինչպես նաև մարզական կազմակերպությունների համագործակցային աշխատանքները։

Այսպիսի նախաձեռնությունները կարևոր դեր ունեն ոչ միայն դպրոցականների առողջ ապրելակերպի խթանման, այլև մարզական մշակույթի տարածման և թիմային ոգու ամրապնդման գործում։