Գորիսի Յուրի Բախշյանի թիվ 3 հիմնական դպրոցի 3-րդ «Գ» դասարանի աշակերտները, դասղեկ Ռիտա Շալունցի ուղեկցությամբ, հպարտությամբ մասնակցեցին ազգային արժեքների պահպանմանն ու տարածմանը նվիրված գեղեցիկ ու ներշնչող միջոցառմանը, որը կազմակերպվել էր Գորիսի համայնքապետարանի նախաձեռնությամբ։ Միջոցառումը տեղի ունեցավ Գորիսի երկրագիտական թանգարանի հարակից տարածքում՝ համեմված հայ մշակույթի ջերմությամբ ու հարազատությամբ։ Միջոցառման շրջանակում ցուցադրվեց մասուրի ապուրի ավանդական պատրաստման ընթացքը։ Երեխաները մեծ հետաքրքրությամբ հետևեցին, թե ինչպես էին մեր նախնիները սիրով և տան ջերմությամբ պատրաստում այս օգտակար ու բուրավետ ուտեստը։ Այս փորձառությունը ոչ միայն ճանաչողական էր, այլև հնարավորություն տվեց աշակերտներին շոշափել հայկական խոհանոցի հարուստ ժառանգությունը։ Միջոցառման մեկ այլ կարևոր բաղադրիչն էր Տոհմի պաշտամունքին ու տոհմածառի կազմման ավանդույթին նվիրված ներկայացումը։ Ակսել Բակունցի տուն-թանգարանի հետ համատեղ ներկայացվեցին Գորիսի նշանավոր տոհմերի տոհմածառերը, որոնք պատմում էին քաղաքի ու մարդկանց հարուստ ու հետաքրքիր անցյալի մասին։ Աշակերտներն ունեին հնարավորություն մոտիկից ծանոթանալու այդ պատմություններին և զգալու իրենց կապը համայնքի պատմական արմատների հետ։ Օրվա մթնոլորտը հարստացավ երգով, պարով ու արվեստի ներկայացումներով։ Միջոցառումը դարձավ մի յուրահատուկ տոն՝ համախմբելով տարբեր սերունդների ներկայացուցիչների՝ մեկ նպատակով՝ պահպանել ու փոխանցել մեր ազգային արժեքները։ Գոհունակություն ենք հայտնում Գորիսի երկրագիտական թանգարանին և Գուսան Աշոտի անվան մշակույթի տունին՝ ջերմ ընդունելության և անգնահատելի նախաձեռնության համար։ Այսպիսի միջոցառումները ոչ միայն հարստացնում են աշակերտների գիտելիքները, այլև ձևավորում ազգային ինքնագիտակցություն և սեր դեպի հայկական մշակույթը։
| |
|
| |
| Դիտումներ: 97 | |
| Մեկնաբանություններն ընդամենը՝: 0 | |