Նոյեմբերի 27-ին Սիսիան քաղաքում անցկացվեց ՀՖՖ-ի կողմից կազմակերպված ՀՀ դպրոցականների բաց առաջնության մարզային փուլը։ Մրցումային օրին մասնակցում էին Կապանի, Քաջարանի, Սիսիանի և Գորիսի թիմերը, որոնց շարքում նաև Գորիսի Յուրի Բախշյանի անվան թիվ 3 հիմնական դպրոցի Մ10 և Մ14 թիմերը։

Օրվա մրցավարտը դարձավ կրկնակի ուրախություն․ երկու տարիքային խումբ՝ երկու հաղթական ելույթ։ Մ10 և Մ14 թիմերը դաշտ դուրս եկան ոչ միայն մրցելու, այլև իրենց ներքին հավատը բարձրաձայնելու և ապացուցեցին, որ համախմբվածությամբ ու կամքով հնարավոր է հաղթահարել ցանկացած մրցակցի։ Եվ նրանք արեցին առավելագույնը՝ հաղթողի վստահությամբ ու խաղի հանդեպ անկեղծ սիրով։

Գորիսի Յուրի Բախշյանի անվան թիվ 3 հիմնական դպրոցի Մ10 թիմը, ցուցադրելով գեղեցիկ ու ուժեղ խաղ, երկրորդ տարին շարունակ դարձավ Սյունիքի չեմպիոն։ Մ14 թիմը, նվաճելով առաջին տեղը, ստացավ պատվաբեր իրավունք՝ ներկայացնելու Սյունիքի մարզը միջմարզային և հանրապետական փուլերում։

Այս հաղթանակները միայն տեխնիկական պատրաստվածության արդյունք չեն։ Դրանք ծնվել են թիմակիցների փոխվստահությունից, միասնականությունից ու հավատից, որ հաղթանակը նախ ծնվում է ներսում, հետո՝ խաղադաշտում։

Շնորհավորում ենք նաև դպրոցի մարզիչներին՝ Ռոբերտ Արզումանյանին և Աննա Աբգարյանին, ովքեր յուրաքանչյուր հաջողության մեջ իրենց անտեսանելի, բայց անփոխարինելի ներդրումն ունեն։ Նրանք այն ներքին ուժն են, որ թիմին տալիս է վստահություն, կարգապահություն ու հաղթողի հոգեբանություն։

Գորիսի Յուրի Բախշյանի անվան թիվ 3 հիմնական դպրոցի սպորտային ընտանիքը կրկին ապացուցեց՝ երբ միասնական են սիրտը, խաղը և նպատակը, արդյունքը դառնում է հաղթանակ։