Փետրվարի 19-ին Գորիսի Յուրի Բախշյանի անվան թիվ 3 հիմնական դպրոցի 3-րդ «Գ» դասարանում անցկացվեց ջերմ ու բովանդակալից միջոցառում՝ նվիրված Գիրք նվիրելու օրվան և հայ մեծ գրող Հովհաննես Թումանյանին։

«Թող գիրքը միշտ լինի մեր կողքին, իսկ Թումանյանի խոսքը՝ մեր սրտում» խորագիրը կրող միջոցառումը միավորել էր դասարանի սովորողներին, ուսուցիչներին և ծնողներին։ Երեխաները ներկայացրին գրողի կյանքի և ստեղծագործական ուղու կարևոր դրվագները, անդրադարձան նրա ստեղծագործություններում արտացոլված համամարդկային արժեքներին՝ բարությանը, արդարությանը, մարդասիրությանը և գրքի նկատմամբ սիրուն։

Միջոցառման ընթացքում հնչեցին Թումանյանի ստեղծագործություններից հատվածներ, որոնք ևս մեկ անգամ ընդգծեցին գրողի մտքի արդիականությունը։ Սովորողները շեշտեցին, որ Թումանյանի գործերը ժամանակի սահմաններ չեն ճանաչում․ դրանք ուղեկցում են մարդուն մանկությունից մինչև հասունություն՝ ձևավորելով արժեհամակարգ, զարգացնելով մտածողությունն ու գեղագիտական ճաշակը։

Միջոցառումն ուղեկցվեց գրական-երաժշտական համարներով․ հնչեցին Թումանյանի ստեղծագործություններից ծնված երգեր, ներկայացվեցին պարային կատարումներ, իսկ դհոլի հնչյունները միջոցառմանը հաղորդեցին ազգային երանգ և տոնական տրամադրություն։

Դասարանի նախաձեռնությամբ գիրքը ներկայացվեց ոչ միայն որպես գիտելիքի աղբյուր, այլև որպես վստահելի ընկեր, խորհրդատու և ոգեշնչման մշտական աղբյուր։ Միջոցառումը ևս մեկ անգամ հաստատեց, որ գրքի և ընթերցանության նկատմամբ սերը ձևավորվում է դեռևս դպրոցական տարիքից՝ դառնալով կրթության ու անձի զարգացման ամուր հիմք։