Ապրիլի 24-ին՝ Հայոց ցեղասպանության 110-րդ տարելիցի օրը, Գորիսի Նահատակաց հուշահամալիրում տեղի ունեցավ հարգանքի տուրքի միջոցառում՝ ի հիշատակ մեկուկես միլիոն անմեղ զոհերի։

Գորիսի Յուրի Բախշյանի անվան թիվ 3 հիմնական դպրոցի աշխատակազմն ու աշակերտներն այցելեցին հուշահամալիր՝ ծաղիկներ խոնարհելու և լռությամբ հարգելու մեր ժողովրդի պատմության ամենացավալի էջերից մեկի զոհերի հիշատակը։

1915 թվականին Օսմանյան կայսրության կողմից իրականացված Հայոց ցեղասպանության հիշատակը յուրաքանչյուր հայի համար դառնում է կարևոր ուղերձ՝ կրթել սերունդներին պատմական ճշմարտության վրա հիմնված մտածողությամբ, սերմանել ազգային ինքնագիտակցություն և ձևավորել այնպիսի արժեհամակարգ, որի առանցքում կանգնած են մարդասիրությունը, խաղաղասիրությունն ու արդարության ձգտումը։
Երեխաները պետք է ճանաչեն պատմությունը ոչ թե որպես հեռավոր անցյալ, այլ որպես իրենց ինքնության կենդանի ու խոսուն մի մաս։

Հիշողությունն ուժ է։ Հիշում ենք՝ ոչ թե ատելու, այլ զգոն ու հպարտ մնալու համար։