Չնայած եղանակային անբարենպաստ պայմաններին, Գորիսի Յուրի Բախշյանի թիվ 3 հիմնական դպրոցի աշխատակազմը և աշակերտները վաղ առավոտից միացել են համապետական շաբաթօրյակին՝ իրենց ակտիվ մասնակցությամբ կարևոր ներդրում կատարելով համայնքի մաքրման, կանաչապատման և բարեկարգման աշխատանքներում։ Շաբաթօրյակի շրջանակում իրականացվել է տարածքի լայնածավալ մաքրման աշխատանք. մաքրվել են դպրոցի բակն ու հարակից տարածքները, հավաքվել է թափված աղբը, չորացած տերևներն ու ճյուղերը։ Աշակերտները խնամքով կարգի են բերել նաև կանաչ գոտիները։ Այս ամենը արվել է մեծ խանդավառությամբ ու պատասխանատվությամբ՝ բնության և համայնքի հանդեպ հոգատարության լավագույն դրսևորմամբ։ Դպրոցի աշխատակազմը ոչ միայն մասնակցել է աշխատանքներին, այլ նաև խրախուսել է աշակերտներին՝ դարձնելով շաբաթօրյակը կրթական կարևոր դաս՝ բնապահպանական արժեքների, համագործակցության և թիմային աշխատանքի մասին։ Բախշյանականները ևս մեկ անգամ ապացուցեցին, որ դպրոցը միայն գիտելիքի կենտրոն չէ, այլև համայնքի կյանքի ակտիվ մասնակից։ Այսօր՝ հատկապես այն պայմաններում, երբ բնապահպանական խնդիրներն օրեցօր ավելի են կարևորվում, նման նախաձեռնությունները դառնում են ոչ միայն գործնական, այլև գաղափարական։ Դպրոցի յուրաքանչյուր անդամ՝ թե՛ աշխատակիցը, թե՛ աշակերտը, իր օրինակով ընդգծեց՝ մաքուր ու բարեկարգ միջավայրը սկսվում է մեզանից։ Համապետական շաբաթօրյակը մեկնարկել է Սյունիքի մարզի բոլոր համայնքներում, և Գորիսի Յուրի Բախշյանի անվան թիվ 3 դպրոցը շարունակում է մնալ ակտիվ նախաձեռնող՝ համայնքային զարգացման, բնության պահպանության և քաղաքացիական գիտակցության բարձրացման գործընթացներում։ Շարունակում ենք միասին ձևավորել մաքուր, խնամված և պատասխանատու հասարակություն։
| |
|
| |
| Դիտումներ: 274 | |
| Մեկնաբանություններն ընդամենը՝: 0 | |