Գորիսի Յուրի Բախշյանի անվան թիվ 3 հիմնական դպրոցի 2-րդ «Բ» դասարանի աշակերտները, դասվար Կարինե Պողոսյանի նախաձեռնությամբ, ծնողների ուղեկցությամբ այցելել են հին Գորիսի Սուրբ Հռիփսիմե եկեղեցի։ Այցի նպատակն էր ծանոթացնել երեխաներին ազգային և հոգևոր մշակութային արժեքներին, խորացնել նրանց պատմական գիտելիքները և խթանել հոգևոր դաստիարակությունը։ Զբոսանքն ուղեկցվել է ուսուցչուհու բացատրություններով՝ եկեղեցու կառուցման պատմության, ճարտարապետական առանձնահատկությունների և Սուրբ Հռիփսիմեի կերպարի մասին։ Աշակերտները հետաքրքրությամբ հետևել են ներկայացված պատմություններին, հարցեր են տվել և կիսվել իրենց տպավորություններով։ Այցի շրջանակներում երեխաները հնարավորություն ունեցան նաև այցելելու Գորիսի հայտնի ամֆիթատրոնը, որը հայտնի է իր յուրահատուկ տեղաբաշխմամբ և քարե թատերական կառուցվածքով։ Նրանք զմայլված էին Գորիսի շրջակա բնությամբ և պատմամշակութային միջավայրով։ Ուսուցչուհին պատմեց, թե ինչպես է այս վայրն օգտագործվել տարբեր հանդիսությունների և մշակութային միջոցառումների համար՝ ընդգծելով նրա նշանակությունը քաղաքի մշակութային կյանքի մեջ։ Երեխաները մեծ ոգևորությամբ էին պատմում այցելության մասին․ նրանցից շատերը նշել են, որ առաջին անգամ էին տեսնում նման հնագույն եկեղեցի և բացօթյա թատրոնի նման կառույց։ Նրանք տպավորված էին թե՛ եկեղեցու ներսում տիրող խաղաղ մթնոլորտից, թե՛ ամֆիթատրոնի բաց տեսահորիզոնից և պատմական շնչով լի միջավայրից։ Տպավորված էին նաև ծնողները, ովքեր կարևորեցին նման այցելությունները՝ որպես կրթության, դաստիարակության և մշակութային ինքնագիտակցության ձևավորման միջոց։ Այցը ոչ միայն հարստացրել է երեխաների պատմական և մշակութային գիտելիքները, այլև նպաստել է համայնքային գիտակցության ամրապնդմանը՝ ընդգծելով մշակութային ժառանգության պահպանման և արժևորման կարևորությունը։
| |
|
| |
| Դիտումներ: 130 | |
| Մեկնաբանություններն ընդամենը՝: 0 | |