Եթե Գորիսի պատանիներին հարցնենք, թե ամենաշատն ինչին են սպասում, նրանք հաստատ կպատասխանեն՝ երկրորդ Թումո տուփի բացմանը։

«Ընկերներիս մեծ մասը սպասում է երկրորդ տուփին,- պատմում է 15-ամյա Մարիան, ով Գորիսի առաջին Թումո տուփի ուսանողներից է, - Ես հասցրեցի գրանցվել առաջին տուփին, թեև մտածում էի, որ չեմ հասցնի, քանի որ սպասողները շատ էին»։

Ամեն շաբաթ Մարիան Թումոյի տրամադրած անվճար տրանսպորտով գնում է Կապանի կենտրոն՝ դասընթացների։ Չնայած որ ճանապարհը երկար է, նա շարունակում է ոգևորությամբ հաճախել Թումո.

«Մինչև այստեղ գալը մտածում էի, թե Թումոյում միայն ծրագրավորում են սովորում։ Երբ իմացա, որ 14 ոլորտ կա, և որ շուտով նաև AI դասընթացներ ենք ունենալու, ոգևորությանս չափ ու սահման չկար»։

Գորիսի առաջին Թումո տուփն իրականություն է դարձել ContourGlobal ընկերության հետ համագործակցության շնորհիվ։

Իսկ երկրորդ տուփը իրականություն է դառնում Ամերիկահայ ուսանողների միության կողմից կազմակերպված (ALL-ASA) դրամահավաքի արշավով՝ Սյունիքը նորարարական կրթությամբ ապահովելու գաղափարի շուրջ համախմբելով Կալիֆոռնիայի տարբեր բուհերում սովորող հայ ուսանողներին և հավաքելով անհրաժեշտ ֆինանսավորման մի մասը։ Գործն իր ավարտին հասցրեց Rev and Rachel հիմնադրամը՝ առատաձեռնորեն տրամադրելով տուփի բացման համար անհրաժեշտ մնացյալ միջոցները։

Մարիա Լալայանը սովորում է Գորիսի Յուրի Բախշյանի անվան թիվ 3 հիմնական դպրոցի 9-րդ «Գ» դասարանում։

Հավելենք, որ Գորիսի Թումո տուփը, տեղակայված է Գորիսի Յուրի Բախշյանի անվան թիվ 3 հիմնական դպրոցի տարածքում՝ Սյունիքի 183 հասցեում։