Ապրիլի 22-ին Գորիսի Յուրի Բախշյանի անվան թիվ 3 հիմնական դպրոցում կազմակերպվեց «Շներին և իտալացիներին արգելված է» վերնագրով ֆիլմի ցուցադրություն 6-րդ դասարանի սովորողների համար։ Ցուցադրությունն իրականացվել էր «Խաղաղության էկրաններ» ասոցիացիայի կամավոր Պոլ Գույիեյի նախաձեռնությամբ՝ դպրոցի և Գորիսի ֆրանսիական կենտրոնի համագործակցությամբ։ Ֆիլմը ցուցադրվեց ֆրանսերեն լեզվով՝ հայերեն էկրանագրերով՝ ապահովելով սովորողների համար լիարժեք հասանելիություն և ըմբռնում։

Ֆիլմը պատմում է մի ընտանիքի պատմություն, որի լեգենդը բացահայտվում է մահամերձ հոր միջոցով։ Լեգենդը սկսվում է Պիեմոնտում գտնվող Ուգետերրա փոքրիկ գյուղից, որտեղ սերնդեսերունդ մարդիկ ծնվել են, ամուսնացել ու մահացել՝ կրելով նույն ազգանունը։ Սակայն մի օր այդ անվերջանալի շղթան խախտվում է. Լուիջի Ուգետտոն, չդիմանալով պայմաններին, անցնում է Ալպերը և տեղափոխվում Ֆրանսիա՝ սկսելով նոր կյանք։ Նրա այս քայլին հաջորդում է ընտանիքի ճակատագրի շրջադարձային փոփոխությունը։

Ֆիլմը վեր է հանում ոչ միայն ընտանեկան պատմություն, այլ նաև հիշողության, ինքնության ու պատկանելիության խորքային թեմաներ։ Պատմության կենտրոնում նրա թոռն է, ով վերադառնում է անցյալ՝ վերաիմաստավորելու իր արմատները և ընտանեկան հիշողությունը։

Ֆիլմի դիտումը դարձավ յուրահատուկ կրթական փորձ սովորողների համար՝ նպաստելով ինչպես ֆրանսերեն լեզվի իմացության խորացմանը, այնպես էլ մշակութային ու պատմական մտածողության ձևավորմանը։

Ցուցադրությունը վկայում է, թե որքան կարևոր է սովորողներին մատուցել արժեքային ու մարդկային պատմություններ՝ խթանելով նրանց հետաքրքրությունը աշխարհի ու իրենց անցյալի հանդեպ։