«Դասը վարում է ծնողը» նախաձեռնության շրջանակում չորրորդ հանդիպումը տեղի ունեցավ 4-րդ «Ա» դասարանում։ Դասը վարեց Գորիսի թիվ 5 հիմնական դպրոցի «Քիմիա» առարկայի ուսուցչուհի Շահանե Ակլունցը։ Դասի թեման էր՝ «Հրաշագործ քիմիա»։

Շահանե Ակլունցը, նախ՝ խոսեց գազավորված ըմպելիքների վնասից, ներկայացրեց, թե ինչպես է այն անդրադառնում մարդու օրգանիզմի վրա, մասնավորապես, մարսողական համակարգի վրա, որից հետո ցուցադրեց «Գազավորված ըմպելիք» փորձը, որի ընթացքում աշակերտները տեսան, թե ինչ կարող է լինել ստամոքսի հետ, եթե չարաշահվի գազավորված ըմպելիքի օգտագործումը։

Հաջորդ փորձերը՝ «Գաղտնի նամակագրություն», «Փարավոնի օձ», «Չայրվող փորձ», «Փղի ատամի մածուկ», աշակերտներին հնարավորություն տվեցին տեսնելու գիտության իրական հրաշքները։ 

Դասի ընթացքում Շահանե Ակլունցի կողմից ներկայացված հետաքրքիր քիմիական փորձերը ցույց տվեցին քիմիայի կիրառական նշանակությունը։ Աշակերտները նույնպես ներգրավված էին տարբեր փորձերի մեջ։ Դասի վերջում նրանք կիսվեցին իրենց տպավորություններով՝ նշելով, որ նման դասերը սովորելու գործընթացը դարձնում են ավելի հետաքրքիր ու մատչելի։

Շահանե Ակլունցն ու 4-րդ «Ա» դասարանի դասվար Գայանե Ավագյանն իրենց խոսքում նշեցին, որ «Դասը վարում է ծնողը» նախաձեռնության ընթացքը ցույց է տալիս, որ այն հաջողված է և արձանագրում է, որ Գորիսի Յուրի Բախշյանի անվան թիվ 3 հիմնական դպրոցում դպրոց-ծնող կապն ամուր հիմքերի վրա է։

Գորիսի Յուրի Բախշյանի անվան թիվ 3 հիմնական դպրոցի տնօրինությունը շնորհակալություն է հայտնում 4-րդ «Ա» դասարանի ծնող Շահանե Ակլունցին՝ նախաձեռնությանը մասնակցելու համար։